VETJA TJETER

njeriu është vetja dhe vetvetja
njëra nga tjetra dyzuar
çka duket dhe çfarë nuk
pasqyrë binjakesh të rreme
selfie me dy palë duar...

humnerë e tyre është njeriu
pa e ditur kush e hodhi atje poshtë
në honet e shpirtit gjithnjë gremisur
pa e kuptuar kush tjetra është...

frymën na zë lëkura jonë
rritemi më shumë se ç’duhet
bëhemi dy e më s’na nxë
ai që jemi dhe vetja tjetër
që hijen të njëjtë me ne e lë
dhe s’e dimë kush na bëri
të ndjehemi ngushtë brenda trupit
............................................
e mësojmë veç kur ikim
se të vdekurit gjithnjë janë dy
por varroset vetëm njëri...

© Artan Gjyzel Hasani