KUKULLA MATRIOSHKA

Matrioshka të nxjerra nga kutia
jemi ne të dy...
me njërin tjetri veshur
për t’u ngrohur pambarimisht…

hollohemi
kur duart zgjasim drejt tjetrit
për ta zhveshur prej vetes

zvogëlohemi
zvogëlohemi edhe më
aq shumë sa fillojmë të ngjasojmë …

thërrime bëhemi
rërë
zanafillë kokëposhtë
pluhur kukullash në duart e fëmijës
që akoma kërkon në kutinë bosh…

©Artan Gjyzel Hasani