AUTOSTOP

mbrëmë për në shtëpi më përcolli një e huaj
e brishtë dhe seksi si makinë e saj...

“ku banon?”

“dy cigare më larg…”

“aha…e kuptova…
qënkemi afër shume…
e sheh atë hirin
që akoma nxjerr tym?
dy puthje më tutje
banoj e vetme unë…”

mbrëmë për në shtëpi më përcolli një e huaj
tunduese dhe seksi si makinë e saj...

“zotëri, a ke emër ? “

"unë…unë…
s’e di…vallë ka rëndësi?

"po si të pëlqen të të quaj?”

“më quaj Frymë
nëse Ajër quhesh ti…”

mbrëmë për në shtëpi më përcolli një e huaj
me gjinjtë kabriole si makinë e saj...
era që frynte
flokët e gjatë ia hidhte
mbi fytyrën time…
dhe ah…pastaj…pastaj…

asgjë pastaj…pastaj…

“arritëm?”
“arritëm…”

“natën…”
“natën…”

“ah…zotëri... e di pse ndalova?
m’u duke fytyrë e parë…
po ti pse erdhe me mua
ashtu… pa më njohur?”

“...se ishe e panjohur.”

(nga libri "MEKATARI")
©Artan Gjyzel Hasani