OREZEMRA

ai riparon zemra të thyera

me pjesë orësh të vjetra
që u mungojnë akrepat
ingranazhet e vockla
nganjëherë edhe zemrekët
dhe në fillim klientët mbeten të kënaqur
deri sa vjen çasti kur fillojnë belatë
rrahin përsëri aritmiket e pandreqshme
alarmohen kur iu teket
ndalojnë kur s’e pret
coroditen nga magnetët
dhe nuk tregojnë kurrë kohën e saktë…

©artangjyzelhasani